༄༅། །བོད་རྒྱལ་ལོ་༢༡༥༣ བོད་ཟླ་༠༨ ཚེས་༡༩ དང་། ཕྱི་ལོ་༢༠༢༦ ཟླ་༠༩ ཚེས་༣༠ རེས་གཟའ་ལྷག་པའི་ཉིན། སེར་བྱེས་མེ་སོར་མཐོ་སློབ་ཀྱི་ཆེད་སྦྱོང་ཉེ་བའི་གཙུག་ལག་རབ་འབྱམས་ཀྱི་བསླབ་པ་མཐར་སོན་མཛད་སྒོ་སྐབས་གཉིས་པ་དེ་བཀྲ་ཤིས་ཆོས་གླིང་ཚོགས་ཁང་ནང་ལ་ཚོགས་སོང་། སྐབས་དེར་སྐུ་མགྲོན་གཙོ་བོ་སེར་བྱེས་མཁན་རིན་པོ་ཆེ་དགེ་བཤེས་བཀྲ་ཤིས་ཚེ་ཐར་མཆོག་དང་། མེ་སོར་མཐོ་སློབ་ཀྱི་ཉེ་བའི་རིགས་བདག་པྲོ་ཧྥེ་སར་ལོག་ནཏ་ Prof Lokanath མཆོག་དང་། སེར་སྨད་མཁན་རིན་པོ་ཆེ་གནས་བརྟན་སྤྲུལ་སྐུ་མཆོག་གིས་གཙོས་སེར་བྱེས་མཁན་ཟུར་རྣམ་པ་གཉིས་དང་། ལུགས་བསམ་གཞི་འགོའི་ལས་དྲུང་ལགས་དང་། མེ་སོར་མཐོ་སློབ་ཀྱི་རྒྱུགས་ཞིབ་ལྷན་ཁང་གི་གཙོ་འཛིན་དབུ་བཞུགས་ཐོག་ཕྱོགས་བཞུགས་སྤྱི་འཐུས་རྣམ་པ་མཆོག་དང་། གྲྭ་ཚང་གི་དབུ་ཆོས་རྣམ་གཉིས་གཙོས་ཚོགས་པ་ཁག་གི་འགན་འཛིན་རྣམ་པ་དང་། སློབ་མ་རྣམས་དང་འབྲེལ་ཡོད། སཾ་བྷོ་ཊ་དང་བོད་ཁྱིམ་སློབ་མ་དང་། སེར་བྱེས་འབྲིང་རིམ་སློབ་གྲྭའི་འཛིན་རིམ་བཅུ་པའི་སློབ་མ་བཅས་འཛོམས་ཡོད། ཐོག་མར་སྐུ་མགྲོན་གཙོ་བོ་རྣམས་ཀྱིས་༸གོང་ས་མཆོག་གི་སྐུ་པར་མཐོང་གྲོལ་རིན་པོ་ཆེ་རྔ་རོལ་དང་བཅས་གདན་འདྲེན་ཞུས་ནས་གྲལ་འཁོད་འཚམས་འཕགས་བོད་གཉིས་ཀྱི་རྒྱལ་གླུ་བཏང་གནང་སོང་། དེ་ནས་སྐུ་མགྲོན་རྣམས་ཀྱིས་རིམ་བཞིན་གསུང་བཤད་གནང་། དེ་ནས་སྡེ་ཚན་གསུམ་གྱི་སློབ་མ་རྣམས་ལ་བསླབ་པ་མཐར་སོན་པའི་ཕྱག་ཁྱེར་དང་། དགེ་རྒན་ལས་བྱེད་རྣམས་ལ་ཐུགས་རྗེ་ལེགས་གསོལ་གྱི་ཕྱག་རྟགས་རིམ་བཞིན་ཕུལ། མཐའ་མར་སེར་བྱེས་ཤེས་ཡོན་སྡེ་ཚན་གྱི་འགན་འཛིན་དགེ་བཤེས་བྱམས་པ་ཆོས་དབང་ལགས་ཀྱིས་ཐུགས་རྗེ་ཆེ་ཞུའི་གསུང་བཤད་གནང་རྗེས་སྐུ་པར་མཉམ་སྒྲོན་ཐོག་མཛད་སྒོ་རེ་ཞིག་མཇུག་ལེགས་པར་གྲུབ་པའི་དེ་ཉིན་གྱི་པར་རིས་ཁག།
Latest News
